VIZA

Azərbaycan Respublikasının Latviya Respublikasındakı Səfirliyinin Konsulluq Şöbəsinə öncədən görüş vaxtı təyin edilməklə qəbula yazılmaq mümkündür. Qəbula yazılmaq üçün consul_riga@mission.mfa.gov.az elektron poçt ünvanı vasitəsi ilə müraciət etməyinizi xahiş edirik.

Vizanın anlayışı, kateqoriya, məqsəd və növləri

Anlayışı

Viza - ölkəyə viza tələb olunan qaydada gələn əcnəbinin ölkəyə gəlməsinə, vizada göstərilən qalma müddətində ölkədə müvəqqəti olmasına, həmin müddətdə sərhəd nəzarət məntəqələrindən müəyyən olunmuş qaydada keçməklə ölkədən getməsinə hüquqi əsas verən rəsmi sənəddir.

Kateqoriyaları

Vizanın - diplomatik, xidməti və adi olmaqla - üç kateqoriyası vardır.

Növləri

Azərbaycan Respublikasına gələn əcnəbilər və vətəndaşlığı olmayan şəxslərə 2 növdə olan - giriş və tranzit vizası aşağıdakı qaydada rəsmiləşdirilir:

- Birdəfəlik (adi) giriş vizası – bu müddət ərzində ölkəyə yalnız bir dəfə giriş-çıxışı həyata keçirməyə icazə verir.
- Çoxdəfəlik giriş vizası - bu növ viza şəxsə müvafiq müddət ərzində ölkəyə çoxsaylı giriş-çıxışı həyata keçirməyə icazə verir.
Vizada göstərilən ölkədə qalma müddətindən vizanın etibarlılıq dövrü ərzində istifadə edilir. Bu müddət ərzində istifadə olunmayan viza qüvvədən düşür.

Bir və ya ikidəfəlik tranzit vizası – üçüncü ölkələrə gedən əcnəbilərə və vətəndaşlığı olmayan şəxslərə Azərbaycan Respublikasının ərazisindən keçmək üçün verilir. Tranzit vizasının etibarlılıq müddəti 30 günədək, ölkədə qalma müddəti isə 5 günədək müəyyən edilir. Tranzit vizaları hava, su, dəmiryol nəqliyyatı və digər nəqliyyat növü vasitəsi ilə gediş marşrutu və ona sərf olunan vaxt nəzərə alınmaqla verilir.

Azərbaycan Respublikasında əmək fəaliyyəti ilə məşğul olmaq istəyən əcnəbi və vətəndaşlığı olmayan şəxslərin nəzərinə!

Azərbaycan Respublikasına əmək fəaliyyəti ilə məşğul olmaq üçün səfər etmək istəyən əcnəbi və vətəndaşlığı olmayan şəxslərə Azərbaycan Respublikasının diplomatik nümayəndəlik və konsulluqları tərəfindən əmək məqsədilə birdəfəlik adi giriş vizası rəsmliləşdirilir.

“Əcnəbinin Azərbaycan Respublikası ərazisində haqqı ödənilən əmək fəaliyyətini həyata keçirilməsi üçün fərdi icazənin verilməsi Qaydalarının və həmin fərdi icazənin nümunəsinin təsdiq edilməsi haqqında” Azərbaycan Respublikasının Nazirlər Kabinetinin 6 dekabr 2000-ci il tarixli, 214 saylı Qərarına əsasən, əcnəbilər və vətəndaşlığı olmayan şəxslər ölkəmizdə əmək fəaliyyəti ilə məşğul olmaq məqsədilə fərdi icazə əldə etmək üçün yalnız Azərbaycan Respublikasına gələndən sonra müvafiq dövlət orqanlarına müraciət edə bilər.

Viza rəsmiləşdirilməsi üçün tələb olunan sənədlər (rəsmi, tranzit, turizm və şəxsi səfərlər istisna olmaqla):        

 Azərbaycan Respublikasının Latviya Respublikasındakı Səfirliyinin konsulluq şöbəsindən viza almaq üçün aşağıdakı sənədləri təqdim etmək lazımdır: 

• Doldurulmuş ərizə-anket formasının bir nüsxəsi;
• Pasport (əsli); 
• Ərizə anket formasında viza üçün nəzərdə tutulan ölçüdə şəkil; 
• Dövlət rüsumunun ödənişi ilə bağlı qəbz; 
• Qəbul edən tərəfin dəvət məktubu. 

Viza rəsmiləşdirilməsi üşün dövlət rüsumu:         (bank qəbzləri hər bir şəxs üçün ayrı-ayrıliqda olmalıdır)

Latviya Respublikasının vətəndaşları üçün:

birdəfəlik giriş vizası:        35 avro  

çoxdəfəlik giriş vizası       35 avro

Vətəndaşlığı olmayan şəxslər üçün:

birdəfəlik giriş vizası:       20 USD ,

çoxdəfəlik giriş vizası      350 USD

*** Azərbaycan Respublikası Miqrasiya Məcəlləsinin 25.3-cü maddəsinə əsasən:

RƏSMİ səfər vizasının rəsmiləşdirilməsi üçün əcnəbinin və vətəndaşlığı olmayan şəxsin təmsil etdiyi ölkənin və ya beynəlxalq təşkilatın rəsmi notası tələb olunur.

*** Azərbaycan Respublikası Miqrasiya Məcəlləsinin 30.1-ci maddəsinə əsasən:

ŞƏXSİ səfər vizası Azərbaycan Respublikası vətəndaşının, Azərbaycan Respublikasında daimi yaşayan əcnəbinin və ya vətəndaşlığı olmayan şəxsin, Azərbaycan Respublikasında müvəqqəti yaşamaq icazəsi olan əməkçi miqrantın və ya təhsil alan əcnəbinin və vətəndaşlığı olmayan şəxsin (yalnız əməkçi miqrantın və təhsil alan əcnəbinin və ya vətəndaşlığı olmayan şəxsin ailə üzvləri üçün) "NOTARİAT QAYDADA TƏSDİQ EDİLMİŞ DƏVƏT MƏKTUBU" əsasında verilir.

Tranzit,Turizm, Rəsmi və Şəxsi məqsədli vizalar istisna olmaqla başqa bütün məqsədli vizalar nümunəsi müvafiq icra hakimiyyəti orqanı tərəfindən təsdiq edilmiş "Azərbaycan Respublikasına əcnəbini və ya vətəndaşlığı olmayan şəxsi dəvət edən tərəfin dəvətnamə ərizəsi (nümunəsi əlavə olunur) əsasında verilir.

QEYD: VƏTƏNDAŞLIĞI OLMAYAN ŞƏXSLƏR TƏRƏFİNDƏN VİZA RÜSUMU AVRO İLƏ ÖDƏNİLƏCƏYİ TƏQDİRDƏ QƏBUL EDİLMƏYƏCƏKDİR. RÜSUM DOLLAR İLƏ ÖDƏNİLMƏLİDİR. 

Viza müraciətinə 10 gün müddətində baxılır

Viza ödənişləri SWEDBANK- da həyata keçirilməli və Bank tərəfindən verilmiş ödəniş qəbzinin əsli konsulluq şöbəsinə təqdim olunmalıdır. 

Viza ödənişləri Viza alınması üçün tələb olunan sənədlərin Konsulluq şöbəsinə təqdim olunduğu ay ərzində ödənilməlidir. 

Viza rəsmiləşdirilməsi barədə zəmanət əvvəlcədən verilmir. Bu səbəbdən, geri qaytarıla bilməyən Avia biletlərin Viza rəsmiləşdirilməsindən öncə alınması tövsiyyə olunmur.

Konsulluq şöbəsi viza rəsmiləşdirilməsi prosesi zamanı ehtiyac olacağı təqdirdə əlavə sənədləri tələb etmək hüququnu özündə saxlayır. Viza rəsmiləşdirilməsi üçün müraciət zamanı verilən hər hansı qeyri-səlis və ya yanlış məlumat, həmçinin tələb olunan sənədlərin təqdim olunmaması viza verilməsindən imtina ilə nəticələnə bilər. Viza rəsmiləşdirilməsi üçün ödənilən dövlət rüsumu, həmçinin viza verilməsindən imtina olduğu təqdirdə ödənilmiş dövlət rüsumu geri qaytarılmır.

 Azərbaycan Respublikasının Nazirlər Kabinetinin 2021-06-16 tarixli 173 nömrəli qərarı

(bank qəbzləri hər bir şəxs üçün ayrı-ayrıliqda olmalıdır)

 VİZA MÜRACİƏTİ VƏ HAZIR PASPORTLARIN GÖTÜRÜLMƏSİ HƏFTƏNİN BAZAR ERTƏSİ, ÇƏRŞƏNBƏ VƏ CÜMƏ GÜNLƏRİ SAAT 10:00-13:00 ARASINDA HƏYATA KEÇİRİLİR.

     Diqqət! Pasportunun etibarlıq müddətinin bitməsinə 3 aydan az müddət qaldığı təqdirdə viza rəsmiləşdirilmir.

ASAN viza (Azərbaycana e-Viza)

Məlumat üçün bildiririk ki,  birdəfəlik (adi) giriş vizaları ASAN-viza ilə yanaşı, səfirlik tərəfindən də rəsmiləşdirilir.